تأكيدًا على حديثنا المرة الماضية، وكيف أنو جمهورك مو بس بيفتح إيميله.. بل وبيتفاعل معه.

أحد الأصدقاء لغى اشتراكه.. 

وللعلم بالشيء، أنو الشخص يلغي الاشتراك .. هي شغلة إيجابية؛ مع الوقت "وحدن بيبقو" اللي فعلًا مهتمين بشركتك.

صار وقت نبلش هلأ.. وببلاش!

في شغلة ما حكينا عنها بأول لقاء، ألا وهي: أنو فيك تبدا نشرتك البريدية بدون ما تدفع قرش.. عكس لما تبلش عالسوشال ميديا!

هلأ أنا كيف وصلتلك؟ 🕵️

ببساطة، شفت إعلان "ممول" عالفيسبوك.. تصفحت صفحتك.. وعملتلك متابعة (يا رب ما كون نسيت بس 😅).. بس السؤال: لما تنشر عن شي خدمة بعد كم يوم، يا ترى شو احتمالية إني شوف منشورك (وسط عشرات الجروبات والصفحات اللي متابعها)؟

ورجاءً انتبه على نقطة مهمة هون: أنا مالي من جمهورك المستهدف! 👀

معنى هالكلام : يعني حتى لو مرق منشور لألك مرة تانية.. ما رح انتبهله.. إلا بقى إذا كنت فعلًا بحاجة الشي اللي عم تقدمه.

طيب، تعى نفترض أنو في حدا فعلًا مهتم بخدماتك/منتجاتك. ومرق على المنشور .. بس كانت الدنيا آخر الشهر (وما معو يشتري أو يحجز). شو رح يصير؟ بأفضل الأحوال، رح يعمل "حفظ" للمنشور.. وينساه!

بهل الحالة، أنت خسرت مرتين.. مرة عليي .. ومرة على هاد الشخص المهتم (بس ما معو يدفع هلأ). 💸

والعدّادة عم تعدّ.. 💸💸💸💸

خلينا نرجع لبرّ الأمان..

متل ما قلتلك قبل شوي. فيك تبدا نشرتك البريدية بدون ما تدفع قرش:

🆓 فمثلًا، عندك منصة (هدهد). منصة عربية بتسجّل فيها حساب مجاني، وبتسمحلك تضيف 500 شخص.

🆓 وعندك كمان منصة (إحدعش). نفس النظام والمميزات.

هلأ في خيارات مدفوعة (بمميزات أعلى). بس بكير نحكي عليها. خلينا عم نطلع السُلّم درجة درجة.

وبهيك، منكون خلصنا حكي لليوم..

المرة الجاية رح نحكي عن كيف تكتب أول رسالة [منسميّه عدد نشرة بريدية 💌]

بس كالعادة.. إذا حاسس حالك مقتنع بالفكرة بس غرقان بتفاصيل شغلك وما عندك وقت تفكر وتصمم وتكتب.. أنا هون كرمالك 🤝 بس حاكيني عالواتس. اتفقنا؟

بتمنالك أسبوع مليان بالخيرات والمبيعات 📈

التوقيع.. ✍️

محمد طارق الموصللي

كاتب محتوى مؤمن بالتسويق الأخلاقي وبناء العلاقات الحقيقية.